مساحة لقتل الشعر ..!!

[نواف التركي]

.



.



.




والله حتى القصيد أحسّ كثرّته = والناس ماهي بـ / أرض وماني بـ / صيّب
لكن عزاي إن من يقرى فلا أجبرته = يجيني بطيب نفس ويرتحل طيّب
والشاعر اللي عروق القلب محبرته = ما هو ولو طال ليل الوجد متهيّب
وش عاد عقبك وباب الحب سكّرته = كل المنابر تقول لشاعرك غيّب
لو كان بالدمع خيره يمدي أخترته = لو بالصبر فود ما خلاّني أشيّب
فإن كان قلبي بليل الحزن سامرته = ما هو بكل الليالي منّك قرّيب

[نواف التركي]

كان تبغى الكلام اللي عليه الكلام = صكّ قلبك عن قلوب العرب وأستريح
مرّ بعيون خلق الله مرور الكرام = ما يضرّك ملام ولا يسرّك مديح
المقامات ما تحشم بوسط الزحام = لا يضيع الغناء بين العواء والنبيح
وأنت عقلك معك والمعذره والسلام = وبعد أذنك بدوّر لي مكانٍ فسيح
خاليٍ غير من صوتٍ يفجّ الغمام = لين وبله على جرد الحنايا يطيح
يمكن يعود يصدح للقلوب الحمام = يمكن الشعر يرجع مثل الأوّل فصيح

[نواف التركي]

شايفك لو كنت أسوّي ماني بشايف = وأبيك تفهم كذا وتجنّب إزعاجي
قلبي غريب متوّحد مبعدٍ عايف = متنائي عن القلوب بـ / هالركن لاجي
أجيه في كل ليلة وأرقب النايف = وأرفع يدين الذنوب المبطيه راجي
وألوج والجّ عبدٍ مؤمنٍ خايف = يارب يارب زيّن درب مخراجي
ملّيت من بهرجة هالعالم الزايف = وأخترت من هالمكان يكون معراجي
أمرّ وجه السنين المظلمة حايف = وأبوق ضحكة تحلل عقدة حجاجي
تدري يـ / لولا القصيد وغايبٍ طايف = طاريه بين الضلوع إن كان ما أناجي
لكن عسى خير ويش بعزلتي شايف = الله يرضى عليك تجنّب إزعاجي

[نواف التركي]

مو غريبه , لا خذانا البعد لأبعد , القلوب أحيان محتاجه لـ راحه ,
والصراحه , صرت محتاج أبعد أكثر ,
ما لقيت أنقى من الوحده ولا أجمل , إنك المبعد بجرحك ,
وإنك أقرب من بعيد وأنك أبعد من قريب وأنّك الصانع من الـ لاشي شي وإنك الزاهد بـ غيّ وإنّك الأكثر علو
منت محتاج لـ غلو , لأنك الساكن بقلب المعدمين الأبسط الأقرب لنبضك ,
تدري إنت أن الشعور الصادق أبلغ ,
وأن طعمك في عيون الناس سكّر , وأن أجملك إبتعادك وأنك أجمل في غنائك , وإن حكي الصامت أبلغ ,
عاد تدري , في غياب الوعي وشـ عذر المحابر ؟
أنها قدرت تكابر ,
وآنا محتاج أبعد أكثر ,
عن حديث المنهكين البالغين من التعب حد السقوط ,
عن بقايا أرواح يسكنها القنوط ,
عن مساحه ما بقى فيها لـ أحلامي مساحه ,
القلوب أحيان محتاجه لـ راحه ,
يا أحبّه ,
كان عذري ما وصل حدّ العفو عذراً عليه ,
ياااااا أحبّه ,
يااااا أحبّه ,
أكره أقرب قلب منكم , أكره أصدق قلب فيكم ,
لأنّي إن حبّيت شؤم لمن أحبّه ,
لأنّي أفقد أي شي إن قلت أبيه ,
كان عذري ما وصل حدّ العفو عذراً عليه ,
مو غريبه ,
لا بكى المرغم على المنفى دياره ,
حس جاره ,
ذكرياته ,
أمنياته ,
كل شيٍ كان يسوى في حياته ,
مو غريبة
مو غريبة
الغريب إنّي كثر ما أبعد أحبّك ..

[نواف التركي]

البداية ..
عادةً تأتي بلا أيّة بداية ..
تنخلق من رغبة الهاوي مراودة الخلود ,
تشبه إحساس الـ تحرر مـ القيود ,
تبتديك بلا سبب , تدمنك تاخذك لأبعد من توقّعك الوصول ,
تاخذك منّك إليك ,
لين تتوغل بذاتك , في سكاتك , فـ التفاصيل الصغيرة , من حياتك ,
لين تتوحد مع الأشياء حولك , لين تنسى من تكون بزحمة التكوين والبعث الجديد ,
كثر ما تتوغل بروحك بتبعد , وكل ما تتوغل أكثر تبعد أكثر , لين تجهل من تكون وكل ما كنت يتلاشى ,
وتبدا ترجع من جديد , تكتشف إنّك بعيد ,
وأنّ قلب أمّك بسيط , وإن حلم أبوك أبسط , وأنّك الجامح لحلمٍ ماله حدود وملامح ,
لو قدرت بأمنية ترجع بعمرك , إرجع لمولدك الأوّل , عيش ثاني كل ذرّات الثواني ,
من يشقّ النور نوّر , من يطيح الليل ليّل , مثل كل الناس خلّك ,
لا تروح أبعد من اللازم كثير , لو منحك الحلم ريشه لا تطير , لا تغادر , لا يغرّك ملمس الحلم الحرير ,
تدري إنت إن الزكاة تحلّ في إبن السبيل , وأنت أرضك من ذهب , لا تكون اللي ذهب , كن مثل أرضك عريق ,
الكلام يغصّ في فمْه الكلام ,
وأتعثّر بالوجيه الفارغه من كل معنى غير من صف الكلام ,
كانت الرحلة تعيسه للأسف ,
البداية خطوة لـ لأي إتجاه ,
بس الأصعب كيف تكتب في نهايتك النهاية ,
كيف تقنع كل من حولك , ذبولك ,
كيف ترمي الورد تطفي الشمع يغرق في عيونك دمع تنسى نفسك بلحظة وتكتب ,
عذراً لكل القلوب اللي مشت وياي واللي ما تقاطعنا أبد ,
ما أظن أن الكتابة بالنهاية تعني إنك قادر تصيغ النهاية ,
بس أكتب , مغلق لأشعار أخر , وأقفلك بالشمع الأحمر , وأنتهينا بالسلامة ,

[نواف التركي]

يموت الشاعر المصنوع من لا شي = ويبقى الشاعر المجبول بالفطرة
وأنا مابين أموت وبين أكون الحي = سجدت أستجدي عيون السما قطرة
أخاف من العجاف المقبلات .. وميّ = تمرجح بين شطر الهاجس وشطرة
تجي متفرّدة ما كنّها إلاّ هي = تهادى لين تنقض جرحي بعطره
وأسيّل روحي من أوّل غياب الضيّ = إلين الليل تنهي نقطته سطره
بعدها وين ما هبّ الحنين ولأيّ = طريق أصب روح من التعب خطرة
وتمرّ الآه في صدر القصيدة زيّ = تناهيد الحمام ولا قضت وِطره
تروح ولا تروح إلاّ بعدها شي = كأنه شعر .. مدري !! بس بالفطرة

[نواف التركي]

تبين الصدق ماعاد الشعر يغري = مجرّد حكيٍ إن ضاق الفضى قلته
مثل طعم الزقارة لا أنجضت صدري = مثل هذا الزمان الغث وأسألته
يا من تدرين عنّي صرت ما أدري = ولا أعرف هـ / الطريق ولا تخيّلته
كبرت أكثر من اللازم وأنا بدري = عليّ الشيب , لكن جاء , وجمّلته
ولا لي حقّ بأرض الله سوى قبري = أمانة شلتها وأحطّ ما شلته

[نواف التركي]

لا توجسّ من حنين القلب خيفة = الشعور أحيان موته في ضفافه
خلّها تقنب ورى العوج الرهيفة = وأطرق الليل الطويل ولا تخافه
غنّ ما للـ / آه في صدرك طريفة = المقفّي ما ترجعه الحسافة
كل ما سلّ العتب فـ / الصدر سيفه = قلّه أحصد ما بلغ منّي قطافه
قبل ما يقبل على الشاعر خريفه = قبل ما يبدى من إحساسه جفافه
صاحبي لو يقدر الشاعر بكيفه = كان ما مدّيت للعمر الكلافة
ولا بلغت العالم الممتد زيفه = من بدايات التعب لآخر مطافه
عقب شفت الظنّ مايِشبع رغيفة = والقلوب أحيان تقتات اللطافة
قلت أدرّجها على راس المنيفة = وأرجع أزرع للجفا عمر ومسافة

[نواف التركي]

مرّت الروح فيك بكامل فصولها = وأنت لاهي وأنا مرّيت مثل الكرام

بين رفض القلوب وهاجس قبولها = كمّ تغنّى على دوح المشاعر حمام

كان باقي بصدرك كلمةٍ قولها = أصعب الذكريات الباقي من الكلام

[نواف التركي]

السوالف تجر فبعضها ياعلي=وأول الليل ماهو ياعلي بأخره
كن حزني على حزن الخلايق ولي =وكنّي لكل لحظات الفرح ذاخره
شاعرٍ لو خلت دنياي ماني خلي=ضحكتي للزمان أحسها ساخرة
وأخري لو قدر ينصفني من أوّلي = ما تعلّقت ذنبٍ يرجي الأخره
المدى بحر وأخر ما ذكرته هلي = قبل تبحر على الـ / لا وجهة الباخره
أتهادى على حدّ السهر ممتلي =والمواني بأحاديث الوجع زاخره
كان هالليل يابن الناس به مقتلي = بـ / آتخيّر لحزني موتةٍ فاخره

[نواف التركي]

القلب غصنٍ يميّله الحنين ويميل = والدمع مثل البحر والعين هي ساحله
والليل كنّه على عين السهارى دخيل = إليا سهى رمش ضاق الثاني وصاح له
والصبر ماهو بكل أحوال صبرٍ جميل = لا تسأل الراحل إسأل عنه الراحله
قلّ للأمل يستريح عن التعب لا يخيل = عذراء السحابة والأرض من الضمى قاحله
علّقت حلمي على شمّاعة المستحيل = تعبت ألوم الزمان الغث وأناحله
تدري إليا خانت النجمة عيون الدليل = يرجع يحسّب وش اللي ظلّ وش راح له
وش راح لي راح عمر وما بقى إلا القليل = وش ظلّ لي ظلّ أعيش الياس وأرتاح له

[نواف التركي]

أوّل مطاريش قلبي جت تسريني = يا حادي الليل بيبان السماء وينها
الأرض في كبرها ماعاد تكفيني = ودّي بروحي تغيب .. أعيد تكوينها
الشعر ما عاد يكتبني ويغريني = وقصايد الناس تكفيني عناوينها
والخلق متشابهين أزوال في عيني = مدري من أصحاب روحي من معادينها
ياحادي الليل فيني ضيقة وفيني = أشياء يا شينها وأشياء يا زينها
مرّات أقول العمر توّه ويمديني = ومرّات ألعّن حياتي وألعن سنينها
كنّ الأمل حبل وأفلتّه من يديني = أو بنت يوم الفراق وعيني بعينها
لا قادر أغيب طيب ولا بـ / يعفيني = وقتي .. ويا كبر وجدٍ بيني وبينها
تبكي تحسب إنّ ما شيٍ يبكيني = تقول : يا قوّ قلبك وإبتسم حينها
إيوالله إنّه قوّي ولا تلوميني = بس إمسحي من هدب عينك سكاكينها
أنا دموعي قصيدي في دواويني = ليتك عرفتي غلاتك يوم تقرينها
ياليل وين أنت في حزني موديني = متطيّنة لا تزيد الماء على طينها
خلّ أوّلك لأخر أنفاسك يسريني = أوّ دلّني بس بيبان السماء وينها

[نواف التركي]

ما كل جرح تقابله بإبتسامه = الناس تسرف بالخطا لا تبسمت
لو كل واحد عارفٍ وش مقامه = ما طارت أسراب العصافير لا حمت
ياكثر في صمتك حديث وملامه = لكن وش يعرّف هل الحكي للصمت
كلٍ على قدّه يفصّل كلامه = وأنت المدى ما ياسعك لا تكلّمت
قل للوجيه الراحلة بالسلامه = والله ما يسوون ضيقك إليا شمت
أنت السما وأهداب عينك غمامه = ما ضرّك إن طاح المطر لا تألّمت
يشبهك شطر لعايض ولك مرامه = ( أنا بعيد إن طحت وأبعد إليا قمت )
حزنك يشابه له هديل الحمامه = وإقفايتك في صمت وإقبالك بصمت

[نواف التركي]

ودّك نغيب .. يالله ما بقى فـ / الصبر = ما يعزّي ولا باقي بالأربع جهات

غير ضيقٍ يراود دفتري والحبر = كنّه الدمع .. وتردّه جفون الداوت

يالله نغيب .. كنّ الأرض صارت شبر = يالله نروح لأبعد ما تكون الحياة

شوف لي درب ما مر الوجيه الغبر = شوف لي أرض ما تنبت بها الذكريات

دوّر لكسري المبطي بصدري جبر = دوّر لـ / جوعي الممتد باقي فتات

أسرفوا بي وشقوّا خافقي من دبر = وإشهدوا لي وسقت الركب دون إلتفات

خوذني وآتغاضى لو خطاهم كبر = إغترابي وعمري والحزن والشتات

[نواف التركي]

يا كثر ما حولي تدور الدواير = وأغضّ وعيون البشر مستريبة
ماغير أفصّل للجروح الستاير = وألبّس الأحلام قدرٍ وهيبة
مكسور لكنّي كسرت العثاير = مهزوم لكنّي هزمت الغليبة
أزمّ روحي يصغرّن الكباير = واللي غريبة صار ماهي غريبة
شبعت من كثر التعب والخساير = ولا عدت أحسّ إن المصيبة مصيبة

[نواف التركي]

من بدايات العمر لأوّل خريفه = من مراهيش الحنين إليا عجافه

كل ما سلّ العتب فـ / الصدر سيفه = قام يحصد ما بلغ منّي قطافه

خلّها تقنب ورى العوج الرهيفة = الشعور أحيان موته في ضفافه

صاحبي شاعرك ما همّه رغيفه = الزمان المرّ علّمه الصلافة

كنت الأجمل للطواريق العفيفة = آه يا ذنبٍ تعمّدت إقترافه

غيمك اللي مرّ عدّاني رفيفه = ماسقى جرد الضلوع ولا جفافه

والهقاوي عوّدت منّك معيفة = شاعرك ضيقتْه من قافه لقافه

صدّة المقفي عن المقبل كليفة = وأنت ما قصّرت في مدّ الكلافه

هاجسي وعيون هالليلة كفيفه = لا تلوم القلب وإن ناظر خلافه

ظاع في هالعالم الممتد زيفه = وأنت تدري قيمة الشعر إختلافه

غنّ ما للـ / آه في صدرك طريفة = المقفّي ما ترجعه الحسافة

لا توجّس من حنين القلب خيفة = ما بقى شيٍ من الدنيا نخافه

عقب شفت الظنّ مايِشبع رغيفة = والقلوب أحيان تغريها اللطافة

قلت أدرّجها على راس المنيفة = وأرجع أزرع للجفا عمر ومسافة

[نواف التركي]

يا حادي البوح ما كان الحكي من سعة = لكن عليّ الحرام إنك عليّ الحرام
إماّ يكون الحديث الموجع فـ / موضعه = ولا نتوب الكلام اللي مجرد كلام
فإن كنت أخر وجيه الناس ماهي ضعه = لكن عشان الختام يكون خير الختام
وإن كنت الأوّل فـ / لأنّي شاعرٍ يتبعه = أهل الهيام إن بقى للشعر أهل وهيام
ياجارة الدمع لو شعري قدرت أصنعه = ما كان يرقي ولا ينفث علي الإمام
يا جارة الحزن وسنين الغياب أشرعة = تجري بها الريح لأبعد ما يكون المرام
تعالي أقسم معك حزنٍ تعبت أجمعه = جروحي عجاف كوني لي ربيع وغمام
لأنّي أحسّك مثل حالي كذا مشبعة = بأحلام كانت وظلّت من نصيب المنام
بأحكي لك اللي ولا واحد قدر يسمعه = لأنّك تمرين بجروحي مرور الكرام
عامين يا جارة الوادي ورى أضلعه = يزوره الحزن يقريه العتب والسلام
عامين أحسّ العيون لدمعها مشرعة = عامين والقلب غصن لساجعات الحمام
والله كنّ الظلام الغث غزّ أصبعه = بعيوني وصرت أشوف الكون كلّه ظلام
أيامي الدرب وآهاتي هي الأمتعة = مابين حلّ ورحيل وذكريات وغرام
كأنني موكلٍ في كل درب أذرعة = وأمرّ مثل النسيم العذب عبر الزحام
انا مثل كل خلق الله لبست اقنعة = عشان اكون بعيونك شي ماهو حطام
الصبح ديكه يصيح ودمعتك مقنعة = وقد بلغتي من العذر المجمّل مقام
فمان ربّي ولا يشغلك قلبي معه = ياما وياما بقى بعيون جرحي كلام

[نواف التركي]

اللي يقول إن كل مطرود ملحوق = قلّه تريّح راحت أعمارنا طرد

ماعادت الأمثال لأحلامي تلوق = وهمومي طروشٍ على خافقي ورد

خلّك من التمثيل واللطف والذوق = ما للمقرد غير تدريجة القرد

[نواف التركي]

تعرفين اللي يغنّي ..
( عيونك أخر أمالي ) ..
تعرفينه ؟
سمعته قبل مدري كم سنه لكن ..
ولا حسيت به لحظه ..
وكان يدندن بعوده ( عيونك أخر أمالي ) ..
( وليلي أطول من اليم ) ..
وكنت أخر من يفكّر يجي يوم وأحس مثله بـ هالأحساس ..
ولا ذكرى ولا عاشق ولا أيّة هم ..
وجيتي مدري من أيّة سحابة تمطرين وكنت ..
أحسب إن المطر نعمه ..
وأبلل في ظلوعي قلب ..
وينبت من سحابك حب ..
.
.
.
( عيونك أخر أمالي )
وصرت أعرف أغنّي مثلهم وآحب ..
وصرتي يم ..
وصار الليل بغيابك مجرد هم ..
وصرتي تستلذيني ..
تغيبين أكثر وأكثر ..
وصرت أشتاق لك أكثر ..
ورحتي تبعدين أكثر ..
وصرتي أخر أمالي ..
وصار الليل مثل اليم ..
وصرت أبحر بلا مرسى ..
تجدّفني يدين الهم ..
.
.
.

ولا ذكرى ولا عاشق ولا أيّة هم ..
لو أرجع بس مثل أول ..
بليّا هم ..
لو أرجع بس مثل أول ..
بلا حب وبلا عشق وبلا أيّة هم ..
لو أرجع بس ..

[نواف التركي]

لعيون (مـي) وبقايـا أحـلام ورديـه=لأخر بقايا الحروف وطـول مشـواري

للصبح لا خالط الضلماء سنـاء ضيّـه=للي اليا غبت تنشد شأخـر أخبـاري

للحزن لسنين الغيـاب لفرحـة الجيّـه=لأصحاب كانوا هنا وأستوحشت داري

غنيت مدري بكيـت ونارهـم حيّـه=تسعر بقايا القصيد وتكسـر أسـواري

هم لبسـوا هالحـروف الغبـر مرثيـه=حتى توشّح سـوادٍ كنـت بـه داري

يا صاحبـي رأس مالـي كـان هالنيّـه=بيضاء ولو طال ليل الحـزن للسـاري

ولاّ الشعـر مـا يشكّـل أي أهميـه=ما عاد به شي يقـدر يغـري أفكـاري

مبعد عن الحـب والشـوق وطواريّـه=عن نافذة هـالشعور أسدلت بـستاري

ما غير (مي) وبقايـا أحـلام ورديّـه=الشعر ماعاد يطري منـه لـي طـاري

[نواف التركي]

لا تحبّه ..!!
أقطف اليانع من الشاعر وكبّه ..!!
.
.
لا ارتكبتك عذري إنّك جيتني ذنبٍ أحبه ..!!
وإن جفيتك , دون سبّة ..!!
أعرف أنّي خفت من نفسي عليك ورحت عنّك ..!!
مو لآنّك ..
أو لأنّك ..
لا لـ أنيّ ..
ما أحبّ أكون مثل الناس عادي ..
ولا أحبّ أكون حلمٍ ما تحقق ..
ولا أحبّ أسرقك منّك ..
أقطف اليانع من الشاعر وكبّه ..!!
لا تحبّه ..!!
.
.
أنت مثل الكل ودّك ..
تعرف أكثر ,
ما يهمّك شي كل اللي يهمّك ..
ترمي بدلوك وتخرج ما تيسّر من حديث وتشربه وتروح مبعد ..
ياخي أبعد ..
مابقى فـ البير ما يروي عطشك ولا بقى بي ..
شي يستاهل أصبّه ..
أقطف اليانع من الشاعر وكبّه ..
لا تحبّّه ..
.
.
ما أحب أكون للعابر محطّة ..
أسف إن خانت بك ظنونك ورحت بدون أسف ..
والعواطف ..
وإندفاعك بإتجاه الـ لا مشاعر ..
من هو بس اللي خدعك وقال لك رح حب شاعر ..
لا تحبه ..
أقطف اليانع من إحساسه وكبّه ..

[نواف التركي]

ما سألتك ..
قلت لي رايح ..
وخليتك تروح ..
جاي بعد الإيش ..
جيت ليش ..
لا تقول الحب جابك ..
قول كل اللي تبيه إلا المحبّة
أنت ما خليت في قلبي مكان
خلّ عنك كان
مابقى لا لك ..
ولا لغيرك مكان ..
جاي بعد الأيش ..
جيت ليش ..
.
.

أنت عادي
ما احبك
ما أكرهك
أنخذلت ?
مومهم عندي أبد
أنجرحت ?
والله عادي مو مهم
فيه أشياء بحياتي منك أهم
.
.
غيرتني دنيتي بعدك كثير
صرت ما أحب الكلام
صارت البسمة على شفاهي عجب
صار صمتي في عيون الناس عادة
لين شمّعت أمنياتي بأغنياتي وأستلذيت الغياب
الغياب اللي أحبّه
الغياب اللي من الداخل بروحي
ما معي غيري أحد
أكتب لنفسي وتقرى
وأتجاهل كل من حولي من الأرواح واقرى
لأني أصدق من يحس بما قرى
ولأن أحبابي قليل ولأن أصحابي قليل ولأنّي المثقل بروحي
في جروحي
فإنتمائي
في وفائي
وأنّي أجمل من كثير
لا تحسب إنك مسوّي في حضورك خير
ويش جابك
كنت مرتاح بغيابك
جاي تحسبني من الفرحه بطير
ما بقى بي ريش
جاي بعد الأيش ..

[نواف التركي]

لي فـ الغياب أحباب
دام الحضور قبور
لا تقرّب الأغراب
دوم الغريب يبور

ويغفى النور ..
ولا أحسّ الحضور حضور ..
وأحسّ إنّ الغياب أجمل ..

تعال نغيب ..
تعال نروح للأخر ..
تعال أكثر من اللازم ..
تعال وبس ..


تعب ياصاحب الأقلام ..
تعب وأحلامنا ما عادت الأحلام ..
تعب وأكثر مساحات الكلام قبور ..
تعبت أحضر شعر وشعور ..


تفتّش بي قلوب الناس ..
عن الإحساس ..
عن اللي ما وراء الصمت ..
عن الخافي ..
عن الــ ... ولاّ بلاش أحكي ..

تعبت أحكي ..
تعبت أكتب ..
تعبت أكذب ..
تعبت أحضر شعر وشعور ..

[نواف التركي]

هذا أنا يا أسماء
تعيشني جروحي
هارب من الأشياء
متوحّد بروحي
أتعمّد الأقصاء
وأستفرد بـ بوحي

هذا أنا ..
أحيان يخذلني الحكي
أحيان يأخذني الحكي
أحيان أحسّ أني طفل وأشاغبك
وألاعبك ..
وأزعل على اتفه سبب

وأحيان أحسّ انّي كبرت بـ هالعمر
وأنّي كذا ملّيتني
وأنّ السنين اللي تمر
ماخلّت بعمري عمر

وأشتاق لـ الأوّل وأحن
وأحسّني مثل السفن
تبحر بعيد مسافرة
وتغيب ضحكتها على كل المواني العابرة
ومكابرة ومكابرة
تخاف لا هبّ الحنين شراعها
تشتاق لأحضان الوطن


لا تعبثين بشاعر أضحى خالي إحساسه من الأحساس
خليه مثل الناس
ينام خالي هم
يصحى ولا يهتم
خليه يا أسماء
هارب من الأشياء
هارب من جروحه
هارب إلى روحه

والسلام
يرفرف بصدره حمام
والسلام يرفرف بصدره حمام

[نواف التركي]

لا تفتح لـ ليل المشاريه الأبواب
يادوب روحي من تعبها تقاوت

من راح ماني ناشده ويش الأسباب
خلاص عندي كل أبوها تساوت

خلّك مثل كل البعيدين .. الأحباب
اللي معزّتهم قليل وتفاوت

خلّ العيون يضمّها ليل الأهداب
الحلم صادق والحقيقة تهاوت

[نواف التركي]

السنابل ماتبي تذبل بكف الريح رحمة ..
لا أينعت راحت تنادي للمناجل ..
أحصدي حبّات روحي وأطحنيها وأخبزيها ,
خلّي الأرواح تقتات الكلام ..
باكر يطيح المطر وأسقي عروقي وأرجع أنبت من جديد
وأتهيّأ للحصاد ..
سمّح الله درب كل اللي حصد منّي غلاه وراح مبعد ..
بالسلامة والطريق اللي وصل فيك بيردّك ..
بالسلامة ..

[نواف التركي]

المسافة :
شي نقدر نقطعه لكن نخافه ..
سلّمي روحك طريق البعد لو كنتي حسافة ..
الحنين :
كثر ما تبعد يبين ..
وآنا جيتك
ياما جيتك بس ما كنتِ تجين !
الصراحة :
جرحي اللي ما قدرت أطلق سراحة ..
من بداية شكّي لآخر محطّات اليقين ..
وآنا أسف ..
قدّ ما أنتي تبين ..
النهاية :
عمر ما كانت صناعة ..
لو قدرت أختار ما أخترت الحضور ..
النهاية ..
قسمة وحظ ونصيب ..
غيب
قدّ ما تقدر تغيب
يمكن أقدر أذبح إحساسي وأغيب ..

[نواف التركي]

( ما لهذا الصبر أخر ) ..
ما لـ هذا البحر مينا ..
وشـ بيدّي ..
كل ما رفرف بقلبي حزن
غنّيته ..
كل ما راود عيوني مزن
بكّيته ..
وش بيدّي ..
ما تخيّرت الكلام ولا تخيّرت السكوت ..
ما تخيّرت الحياة ..
بسّ يمكن ..
أقدر أتخيّر أموت ..

لا تمرّ بروحي إلاّ عابر وقلبي معاك ..
لا تمرّ جروحي إلاّ من هناك ..
من بعيد ..
مثل طعم العيد ..
خلّك أبعد من مسافات الطريق اللي مشيت ..
خلّك أبعد ..
ما بقى في دفتري وقت وحنين ..
لو لمحت أنّي حزين ..
لا تجيني ..
خلّني منّي وفيني ..
لا تجيني ..
القلوب أوقات تغريها المواجع ..
وأنت عارف ..
ما بكت عيني فراقك يوم طريّت الرحيل ..
كانت دموعي قصايد ..
كانت جروحي قلايد ..
كل جرح ألبّسه شعري ويفرح ..
شوف كيف أحيان بعض الشعر يجرح ..
رح بعيد ..
ماني راجع ..
القلوب أوقات تغريها المواجع ..
رح بعيد ..
رح بعيد ..

[نواف التركي]

تعال أمطر ..
يبس غصن الكلام المورق الأخضر ..
ولا ساقي ..
ولا غيمة يبللّ ضحكها أرواقي ..

سنين وشاعرك يقطف عناقيد الكلام العذب ..
ولاغايب قدر يرجع ..
ياليت العمر.. شريط أقدر أعيده كل ما غايب بذر نبتة غلاه بداخلي وأقفى ..
عشان من أوّله أجفى ..
عشان أرتاح من هذا الحنين اللي تغافلني وجاب أقصاي ..


تعال أمطر ..
عشان يكون للدنيا طعم ثاني ..
عشان أذكرك وأنساني ..
عشاني كان باقي لي بقلبك شي ..
عشاني مو عشان الشعر ..

مدد يا سيّد أوجاعي ..
كذا ماعادت الدنيا تساوي شيّ ..
كذا ما أحسّ بأنّي حيّ ..
أنا محتاج لك حتى لو أنّك جرح ..
تعال الليلة أكثر من كذا وأكثر ..
تعال أمطر
تعال امطر



تعال أبيك اليوم
خل بكرة لبكرة
طيّر حمام النوم
لو كنت بي مكره
خلّ الكلام يحوم
وأقنص لك الفكرة



تعال وشوف وشلون أبعث الميّت من الأحساس من قبره ..
تعال أنفخ لك بروح الشعر ما يطرب الأرواح ..
أنا ياسيدّي ربّ الكلام الموجع المرتاح ..



تعال أمطر ..



يبس غصن الكلام المورق الأخضر
ذبلت بغيبتك يا ساقي أحزاني

حسبت أنّي على هذا الغياب أقدر
وقلت أسلّمك لكفوف نسياني

وكان الدرب موحش والحنين أكثر
وكنت بكل درب أروح تلقاني


وكانت كل رغبة داخلي تصغر ..
وكنت أكبر..
ووحدك داخلي تكبر ..

أخيراً والحديث الموجع أحياناً هو الأحساس ..
أمانة خلّني بك غير كل الناس ..
ورح مسموح ..
لا ترجع ..
ولا يورق بعدك أحساس ..
ولا تمطر ..
هي الذكرى وحدها القادرة تبعث حياة بداخلي وأكتب ..
وأحسّ أني مثل هالناس ..
وأحسّ أنّ لجروحي قلب ..
وأروح أكبر ..
مثل كل الشجر لما يتساقط في خريف العمر ..
أنا ياسيّد أوجاعي بديت أسقط ..

[نواف التركي]

http://www.youtube.com/watch?v=0MmAWaL7RtY

[نواف التركي]

الليل محراب الوجع والتباريح = وأنا بسكين الحكي .. بذبح الصمت

ما عاد يغريني حديث المراجيح = ولا الهوى اللي عقب عرفه تندّمت

ولا عاد تخدعني دموع التماسيح = من كثر خذلان الخلايق تعلّمت

أكون بارد دمّ لو قلبي يصيح = وأضحك بوجه جروحهم لا تألمت

واللي تغانم طعنتي ربّي يبيح = منّه , ويجبر زلّتي يوم عشّمت

محدٍ معاه لضيق صدري مفاتيح = حتى الذي في صدق قلبه توسّمت

هذي ذنوبي بين دعوة وتسبيح = علّقتها في رحمة الله وسلّمت

ما عادت حروف القصايد مصابيح = ضويت لين إستنفذ الشعر وأظلمت

تجري بما لا تشتهي سفني الريح = حتى معاها وين هبّت تيممت

ما كان ودّي يبلغ السيل وأزيح = وجه الرضى , عن طلّتي لا تكلمت

ليته يكفّي عن غثى الحكي تلميح = أو ليت بعض الناس تستوعب الصمت

[نواف التركي]

http://www.youtube.com/watch?v=ChkZtuLiGLk

[نواف التركي]

http://www.youtube.com/watch?v=0MmAWaL7RtY

[نواف التركي]

من يقول الصدق جنّة ..!!
ماصدق ..
جرّب تعيشه صحيح إنّ كان ودّك ..
شوف كيف يهدّك ..
وأنت ما قصّرت والله العظيم ..
لك بصدري عمر ما تكذب
عشاني ..
كنت أناني ..
كان مفروض أتْركك ترتاح منّي ..
لاتغنّي ..
أكذب .. أكذب ..
حبّ ألعب طيش ..
روح لأحضان الغواني ..
للسواني ..
وأشرب أشرب ..
سوّ كل اللي نهيتك عنّه ..
من يقول الصدق جنّة ..!!


لا تغنّي ..
ماذبحني غير صوتٍ أبعثه منّي لـ منّي ..
أسف أكثر من سنينك ..
من تعبْك ..
ومن حنينك ..
وأكثر أكثر أسف ..
كثر ما جرّيتك لشوك الطريق وتمشي ..
كثر ما بللت رمشي ..
كثر ما أهرب فيك من كل السنين الخضر لسنين الجفاف ..
كثر ما نوّاف صادق مع نوّاف ..
من يقول الصدق جنّة !! ما صدق ..


رح هذاك الدرب وأصوات الغياب تنادي ..
( يا فؤادى لا تسل أين الهوى
كان صرحا من خيال فهوى

اسقنى واشرب على أطلاله
وارو عنى طالما الدمع روى )
رح هذاك الدرب وأصوات الغياب تنادي ..
مدّ روحك وتتلقفّك الأيادي ..
وأنتبه في يوم تصدق ..
أكذب أكذب ..
وإنّ شعرت بذنب لا تحزن تذكّر ..
أنّك أخر قلب يسقط ..
وأنّ صدقك جمرك ..
وإنّ كذبك خمرك ..
أثمل أثمل , غيب عن كل القناعات السخيفة , عن اساطير الغرام , والحكايات القديمة , والوفاء والصدق وأطباع الكرام ..
لأنّ هي الدنيا ماعادت مستقيمة , لا تكون أنت الوحيد المستقيم , هيم هيم ..
كل وادي غيّ مرّه ..
كل كذبة في طريقك أرتكبها ..
سوّ كل اللي نهيتك عنّه ..
من يقول الصدق جنّة !! ماصدق .

[نواف التركي]

ضحكت أيّام كان الضحك يعني شي ..
بكيت أيّام كان الدمع يعني شي ..
أنا هالحين فـ البرزخ ما بين الحيّ والـ لا حيّ ..
أحسّ أنّي نصب ذكرى لـ شاعر ( كان ) ..
غزير بكل ما يعني وش الأنسان ..
وكان وكان وكان ..
تعال أحكي لك اللي كان ..
بداياته ..
شقيٍ جا من أطراف القرى في جعبته مزمار ..
وغنّى يوم راوده الحنين وصفّق الجمهور ..
وكان الصامت الثرثار ..
وكانت كل خطوة بعد تغريدة ..
وكان أصغر من أنّه يفهم الأقدار ..
مغامر مايهاب ويدفعه للمجد سيرة دمّ وسيوف وحكاياتٍ من التاريخ لأجداده ..
لماضي كان ..
وصار اليوم جلاّده ..
وغادة ..
كانت توصّيه بقلادة ..
ترك كل القلوب وراح ..
بداياته ..
ودايم للبداية طعم يغري ..

يتبع ربما ..

[نواف التركي]

اللي أعرف إنّ الورق = أبيض ولا يمكن يخون

وإنّي على حدّ الأرق = أنزف من الحبر الظنون

أبحرت بك حدّ الغرق = غويت بك حدّ الجنون

الحب علّمني أرق = وأغراك تسرف بي وأهون

يمكن تبينا نفترق = ولاّ تحاليت الطعون

يمكن وصلنا المفترق = حتى نكون أو لا نكون

[نواف التركي]

من يوم مات الكلام بصدري ونامت = عيون وجدي نذرت البعد لأقدامي



وأدركت بإن النهاية حق ما دامت = قبلي لـ / شاعر عشان تدوم لأقلامي



هل كان ماراح إلاّ روح قد هامت = في كل أرضٍ تدوّر مرقبٍ سامي



وهل كنت إلا آتحاشى نظرة الشامت = وأحاول بقد ما أقدر أنصف إلهامي



فليغفر الله ذنب أوهامي إن ( قامت = بحمل روحي إلى ما يقتل أحلامي )



روحي مرومة شرف وبعذرها رامت = بلوغ سابع سما لو ترفض أيامي



يكفيني إنّي قدرت أحاول ولامت = خلق الله وما كسر عزمي ولا إقدامي



حتى بلغت آخر اللي يمكن وحامت = روحي مثل كل طيرٍ حرٍ قطامي



فإن كان دنياي قصّت جنحي وسامت = نفسي بحملٍ ثقيل يكسّر عضامي



يبقى العزا كان ضامتني فقد ضامت = قبلي صناديد قومٍ تنطح الرامي



ولدت رغماً عن أنفي منغبن صامت = وبموت رغماً عن أنف الوقت متسامي



فـ / ياصاحبي حطّ رحل الشعر قد شامت = روحي ومات الكلام وجفّت أقلامي

[نواف التركي]

لو ما أنت ما عانق عيون المساء جفني = لو ما أنت ما لاح صبح ولا غفت عيني

على كثر ماني أعرف صرت ما أعرفني = على كثر ما أنت تعنيني تعنّيني

أنا دخيلك إذا أنك ماتبي عفني = أكسرني اليوم قبل أكسر بك سنيني

ماعاد باقي كثير من التعب شفني = واقف والأشياء تسقط من حواليني

وحدي , وأنا الناي ثغر الليل يعزفني = وحدي والأيام ماقدرت تنسّيني

[نواف التركي]

ضايق ومن عادتي لا من’ صدري ضاق = أروح أهجّيه بعض الشعر ويروّق

والليله أحسّ بأن الحزن فيني فاق = والشعر من فوق ضيقي كنّه يضوّق

الليل خنجر وصبح الناقمين أعتاق = فتّق وعجزت يدين حروفي تروّق

والريح تشلع طنب صبري بلفح أشواق = والدمع مبطي لغزو الجفن متشوّق

يا حادي الركب لا تسجع بلحن فراق = مبطي وأنا من كفوف الوقت متذوّق

رح غنّ عنّي وبلّغ معشر العشّاق = صحبي وقوفاً لحزن أرواحنا نسوّق

من كان مثلي يجي وأقسم معه ترياق = من كأس يصحي من الأهات ويفوّق

نجمع فتات الفرح نسكب على الأوراق = ويولد من أرحام هذا الحبر متعوّق

[نواف التركي]

ما عاد في حالـي الحالـي=لو قلـت فكّـر وش/ أفكّـر

ماعـاد فـي بالـي أبالـي=الليلـه أحــسّ متعـكّـر

الحـزن مالـي ومـوّالـي=وباب الفرح مبطي مسكّـر

ياصـاح جالـي وفنجالـي=تصبّ بـه ملـح أو سكّـر

نفس الطعم ما أعرف الحالي=بس أنت صبّـه ومتشكّـر

[نواف التركي]

سحقاً لهذا السديم ووجهه الشاحـب
غمّضت جفني عليه ولا وصل بكره

غلطان من يعتقد بأن المدى راحـب
غلطان من يعتنق لو كذب هالفكـره

من علّم الورق تسجع لحنها الناحب
من علّم الصوت يرجع فالصدى مكره

كن لي عدواً ولكن لاتكـن صاحـب
عشان أرد الطعون لصدرك وأكـره

[نواف التركي]

على عكس الهوا سيري على عكس إتجاه الريح = على الله يا مجاديف السهر ننسى مواجعنا

دخيل الملح وأسراب الحمام أتجمّلي لا أطيح = ترا ما ودّع القلب التعب من يوم ودّعنا

غفى بعض الوجع لكن بقى بعضه معاي يصيح = وأخاف اللي حداني للرحيل يضيق بالمعنى

هو أدرى يومه إستثنى الكلام وفضّل التلويح = وأنا أقسى يوم طرّفت الملام وقلت له دعنا

نصافح بالرضى كف الفراق وما نبي توضيح = معاك الله رح يبقى عزانا في مدامعنا

[نواف التركي]

هذا مكاني ما أبي أروح عنّه = مرتاح عن كثر الكلام وقليله

ألوذ به عن كل كذب وممنّه = وأرتاح من سخف النفوس الثقيله

ياليل وإن جريت لي لحن غنّه = لو كان ماعقب التعب من حصيله

لقيت بك عن نار الأشواق جنّه = ونسيت بك حزن الطروق الطويله

[نواف التركي]

لا تمد يدين وصلك للحسافه = ما بقى فيني على الأشواق حيل

كان فيني قلب قبل أعلن جفافه = كان فيني روح وأشجار ونخيل

كنت أرواد كل حلم ولا أخافه = كنت أسولف عن بلوغ المستحيل

عاد تدري كل هذا الشوق تافه = عقب راح العمر وعيوني تخيل

[نواف التركي]

اليوم أولّـع شمـوع أول ثلاثينـي=اليوم أببدأ برحلـة عمـري الثانـي

ماني مخلّي زمانـي يسـرق سنينـي=يكفيه مني ذبول الـورد بأغصانـي

يكفيه شعري مواويلي سهـر عينـي=يكفيه يهدي ربيع العمـر لأحزانـي

يكفيه في مفترق هالـدرب يرمينـي=ما كنّي اللي عطيته عمـري الفانـي

هالحين يكفي تعب ماعـاد يمدينـي=أقطف بقايا سنين العمـر لأشجانـي

لا عشق لا شعر لا غربـه تودينـي=عن كل شئٍ بـأشرّع باب نسيانـي

ماهو مهم من يروح ومن هو يجينـي=أقرابي أصحابـي أحبابـي وخلاّنـي

عذراً .. هنيّا .. خلاص أبنفض يديني=بـأعيش عاقل تعبت أعيش بجنانـي

هنا قتلت الجنـون ومـن يعزينـي=أو من يبارك خذيت بـثار حرمانـي

هنا بـأطفّي شمـوع أول ثلاثينـي=هنا خلاص أبتديت بـعمري الثانـي

[نواف التركي]

أبطن لك الله ما طرقني هواهن = ولا لاج في صدري عواهن وغنن

وأنا أتحرّى وصلهن من غلاهن = وعرفن غلاهن وأبعدن وإستمنن

قلت أتمنّع لين أوصّل مداهن = وما أمداني إلا بالفراق يتحنن

يا علّ طاري فقدهن من فداهن = من هو بعدهن بـ / الجروح يتفنن

ومن غيرهن يقدر يشابه إحداهن = لا ضاقت فجوج الوسيعه وحنن

وأقفيت أمسح دمعتيني وراهن = وصلّى لهن وجه الكلام وتسنن

وأطلقت جنحان السهر في سماهن = وأستدركنّي قبل أحوف المجنن

هن مالهن غيري ولا لي سواهن = لا قربن نجر إغترابي ودنن

وهيّلت طبختهن وقللت ماهن = وصبيتهن لأوراق شعري وعنن

لكل عابر شوق يبحث خفاهن = يهنى بهن لو كانهن ما تهنن

مبطي مرتّع ذود قلبي حماهن = ولا يوم عن نطح المقابيل كنن

والخوف كان أقفن وقفّى هواهن = ولا عاد لاجن في ضلوعي وغنن

[نواف التركي]

لا تشغل البال فيني ضيق ويعدّي = متعوّده لا تضّيق بالك أحزاني

أكثر من اللي مشيته وين بيودّي = أكثر من اللي لقيته ويش يلقاني

علّمني الطيش كيف أروق وأهدّي = وعلّمني الحكي كيف يلعثم لساني

ما عاد انا اللي يقول الناس من قدّي = صرت آتغاضى كثير وصرت ما أداني

[نواف التركي]

كذا من دون زخرفة الحديث وبهرج التوظيف = كذا من دون تعقيد وخرابيط وكلام أفلام

يقولون السماء تمطر ولكن يا مزون الصيف = شبعنا من خرافات الوصول وكذبة الأوهام

مبادينا سرابٍ بأخره طعم الأسف والحيف = وأمانينا محالٍ في طريقٍ يقتل الأحلام

صدقنا لكن الصدق يتوارى مثل وجه الطيف = ولا ينفع سوى الكذب المقيت بعالم الأرقام

خويي والمنابر عوّدت عقب الثراء تشريف = علاها الفارغين وعظّم الوقت الردي أجرام

تدق صدورها مدري طبول الوهم والتسويف = وترجع كل ما حمي الوطيس تنكّس الأعلام

لك الله يوم أبرّق ما لقيت اللي كـ / حد السيف = ولكن يا كثر يوم أتلفّت شرهة الأقزام

أدق النجر في ظلما السنين ومابقى للكيف = سوى النزر القليل وتغرق الدنيا بالإستفهام

هنا تتأرخ الدنيا ورق يروى بلا تحريف = هنا يتدوّن الصدق الكريم وتسقط الأزلام

هنا والشعر مثل البرق مثل الحلم مثل الظيف = هنا والفكر سوق المترفين ومبعث الألام

هنا والصبر يترنح فوجه المهزله والزيف = هنا والشاعر أعذر من ملام وجفّت الأقلام

[نواف التركي]

لا تجرّب في حديث اللعب طولة بالي = ولا تنبّش لين تلقى الكلمه المقبوره

شفني أبعد قد ما أقدر للمكان الخالي = وأتنائى عن زحام الألسن المسعوره

يعني الله يصلحك ماهو قريب وصالي = ولا أتشكل لأجل عين الشاعر وجمهوره

عند نفسي مايجي مثلي وشايف حالي = لا .. وأشوف إني بعين المبدعين إسطوره

شاعرٍ مكسور بين الصمت واللا والي = جغرف الأرض بقدم رجله وقلّ حضوره

ما يونّس فالدروب إلا صدى موالي = وإبتهال الجرح يوم أطلّعه من طوره

وما يحرّك هاجسي غير الطويل العالي = لا أرقب القلب الظلوع ولاحت المعموره

يمكن أجني ضيعة الماضي وسوّ أعمالي = ويمكن إن الروح في هذا الأمر مكبوره

فاهم إنت شلون ..؟ ماحن الفؤاد لغالي !! = عارف إنت ؟إن الطرق في غربتي مهجوره !!

كان تقدر ..!! لا تحب أشباهي وأمثالي = دون أوضح لك وخل السالفه مستوره

روح حب اللي تحب وخلني في حالي =واجد اللي يجهل إحساسي وطيب شعوره

تبلش بقلبي لأنّه ما بقى فأمالي = غير أدرجها لحظن الغبّه المحفوره

وأنت ربي يحفظك عقب الكلام التالي = كان عندك صورتي قطّع عروق الصوره

[نواف التركي]

.


.


.


أجمل اللي عرفت بهالحياة رحلو = غيّبوا غيبة الضحكة بوقت العزا
كنّ قلبي غريمٍ عن دياره جلو = كل ما جاه علمٍ عن ضعنهم غزا
أبذروني غلا حتى بلغت الغلو = وأحصدوا دمعتي يوم المفارق جزا
كان ودّك تطيح فطيحةٍ من علو = أجمل الشعر شيٍ تكتبه من وزا
.
.
.

ياحادي العيس ليت العيس ما مدّت = على وحى الصوت يوم يدوّه الساقي
أسمع حنين الزمل وقلوبهم شدّت = وأتلحّف الصبر غصب وتلفح أشواقي
حسيت كنّي طلل لـ : سنين قد عدّت = ما هو بوقتي ولا تسمح لي أخلاقي
أتبع لي أرواح يوم أقبل لها صدّت = لو كان ما يستريح الدمع بأوراقي
سلّمت للبعد يوم أقفيت ما قدّت = قميص فرقاي من تستطعم عناقي
بكره جفيته وعين البارحة سدّت = عن كل حزنٍ جديد يراود أعماقي
ياهيه ماعاد فيني قلب .. لاندّت = ورود الأحلام قل ماعاد به باقي
حمامة الروح لأعشاش الصدر ردّت = وأبكسر جناحها لو تطري فراقي
قصايد الوجد لا جابت ولا ودّت = باهت غروبي وباهت مثله إشراقي
الحين يا من لـ : عينٍ كل ما لدّت = كنّه تدوّر لوسواس الشعر راقي
هذا هو الصدق وضعون الجفى مدّت = عسى الغياب الطويل يموّت أشواقي [/quote]

[نواف التركي]

يا محمد أجمل ما تذكّرت مفقود = خالي مكانه لا تفقّدت صدري

كنّ العمر في ناصية فقد معقود = وكنّ السنين لوجهة الياس تجري

أغيب روح وهاجس الشعر موجود = وأكتب وأنا مغلوب منّه على أمري

أحيان أحسّه صوت بشرى بمولود = وأحيان أحسّه ناعيٍ فوق قبري

ما في شعوري عن تفاصيلهم زود = لكنّي أقبض بيد الأحساس جمري

ما للسفر وجهة ولا عمر وحدود = من وين ماهبّ الأمل سقت عمري

صاحبْك مع حزن النهايات موعود = ولا عاد شيٍ في البدايات يغري

تعال نسنى بير الأحلام بركود = ونصبّ أغاني في فم الليل بدري

على تقاسيم الوجع دندن العود = = وأصدح بما أوتيت وأصدح بشعري

دام الفرح بكفوف الأحزان موؤد = سلّمت لأفواه المقادير عذري

لا ضحكةٍ تولد ولا غايب يعود = ولا أفلتت كفّ المشاريه صبري

واللي عليه حيام أحاسيسي ورود = ليته عن اللي يطرق البال يدري

ماكان أغيب وهاجس الشعر موجود = ولا مكانه خالي بوسط صدري

[نواف التركي]

ياسيّدي الغاوي = أنا تعبت أحلم

لو شفتني ضاوي = ما شفتني مظلم

وإن شفتني قاوي = شفني وأنا أتألّم

بطّلت ما أخاوي = أخاف بسّ أسلم

[نواف التركي]

حضورك ما يخلّي للغياب حضور ..
ولا أنتْ تعرف وش جابك ..
ولاني آخر أحبابك ..
كأنّك طفل ..
وكأني لعبةٍ مليت منها بس ..
يجي غيرك بياخذها
وتغليها ..
وإلا من راح ..
ترميها ..
رخيصة عندك الأرواح ..
وأنا ماغير قلبٍ كان ..
حديثٍ حيّ ماقدرت تصيده بندق النسيان ..



تعال نغيب ..!!
كثر ما كان لحضورك طعم ثاني ..
كثر ما ضحكتك تغري ..
كثر ما كنت بك أجمل ..
كثر ما كنت بي الأجمل ..
كثر ما أذكرك وأنساني ..
وتنساني ..
وخذلاني ..
كثر ما كنت بك أغرق ..
أبيك تغيب ..!!




وإذا مرّيت بـ أحبابك ..
تذكّر ..
كانوا أحبابك ..
ووقّف عند طعم الـ ( كان ) ..
كذا تعرف ..
بأنّك فعل ماضي ..
كذا تعرف بأنّ اليوم ماهو أمس ..
وإنّك كنت ..
وإنّ الـ ( كان ) ..
حديثٍ حيّ ما قدرت تصيده بندق النسيان ..

[نواف التركي]

يجب أن لا نؤمن بالشعر كثيراً .
.
.
.

أرواحنا الثرثارة = ملّت حديث الماضي
يا سيّدة هالحارة = تستغربين إعراضي ?
إنتي كما النوّاره = وأنا أمحلنّ فياضي
الحين أنا ياجارة = قانع معاي وراضي
العزلة المختارة = ولا الحضور الفاضي

, , ,

الشعر حاله وأنا عايش بـ / هالحاله = والناس قفرٍ تحرّى طيحة الصيّب
واللي بيوته تبختر فيه مختاله = ينام عنها مثل ماقال أبو الطيّب
واللي على البال ما مرّيت في باله = الحين لو هو قريّب ماهو قريّب
مابين تدويرةٍ وإقفاي وإقباله = وظنون مرّه تصيب ومرّه تخيّب
هيّلت لي ضحكةٍ للدمع ميّاله = وقهويت عين الرفيق بحالي الطيّب
موت الأجاويد لا منّه غدت عاله = وأنا لو أنّه شعور أحسّه يعيّب
رح قل لبكرة يجي رجلي وخيّاله = ماني من المقبلات السمر متهيّب
يبحث خفاي الزمان ولا تهيّاله = وأشيّبه مثل ما في راسي مشيّب
والأدمي كان ما شابهته أقواله = أحسن له عن الحضور الباهت يغيّب

[نواف التركي]

شعرك مساريك حزنٍ يسكن بصوتك = طرقك طواريك حلمٍ طوّل غيابك
حكيك غناويك دربٍ بأخره موتك = همّك مباديك صدقٍ فرّق أحبابك
توحّدك في عيون الناس وسكوتك = أغرى بك آخسّ خلق الله يغتابك
تدور فيك السنين .. وتمشي .. تفوتك = وأنت أنت ما دقّت الدنيا على بابك
تقتاتك الناس وأنت تجود في قوتك = تموت في داخلك والناس تحيا بك
ياعمّ فضفض خلاص وهات مكبوتك = خلّ السواقي تغنّي نبرة عتابك
إن عشت صادق تموت وتخلد بيوتك = يتذكرك كل صادق قلب غنّابك
وإن متّ كاذب يغيب بغيبتك صوتك = لاصرت عادي فـ / عادي مثلك غيابك

[نواف التركي]

كلّ ممكن زهدته في رجا المستحيل = قلت آباطول نجمة ما حدٍ طالها

يقنع القلّ من عزمه بروحه قليل = الحرار إتضايق من ردى حالها

لا تململ ترا بال المفارٍق طويل = والليالي عجافٍ يا وسع بالها

علّمتني على طول المدى والرحيل = أضحك إنّ شالت الأحزان موّالها

حسبي الله على وقتي ونعم الوكيل = ظلّ يستدرج الأحلام وأغتالها

مابقى تمر لو هزيّت عذق النخيل = إقطفتها السنين وماتت آمالها

ملّت العيس حاديها يحطّ و يشيل = ودّها تستريح وترمي أثقالها

وجد حالي وأنا حالي بليّا نحيل = وجد من محتمي له كلمةٍ قالها

يومّ دنّ الشمال وهبّت الريح هيل = لين روحي بغت تقضي على جالها

إيييه ياللي مثل قلب الزمان البخيل = جادك الدمع وعيوني وغربالها

غصنك اللي مع أنفاس الحكاوي يميل = ماترك عدله إلاّ ميّل أحمالها

شاعرك مؤمن إنّ الوصل ماله سبيل = لكنّ الروح ماهو راضي إذلالها

كان في حاله وفاله وطبعه ثقيل = لكن الناس تكذب ماهي بفالها

كان ممكن أكون وكنت مالي مثيل = تشبه الناس بعض وواجد أمثالها

لو لصوتي مع العالم شبيه وبديل = كان خلّيت الأنفس تلبس أسمالها

[نواف التركي]

خليل كلّ القلوب الصادقة غابت = ماعاد أحسّ لحديث أشواقنا قيمة
الحين نرمي ظنونِِ كل ما خابت = رحنا نعلّق ضمانا في رجى غيمة
أعمارنا مورقة وأرواحنا شابت = والشعر ماعاد تغرينا تقاسيمه
نقول طابت وهي والله ماطابت = ولا كلّ كبوة من الدنيا بتعليمه

[نواف التركي]

أندفعت أكثر من اللازم عليك ..
أدري ..
أدري أدري ..
أدري إنّي جيت كلّي ..
ماتركتك تنتظرني ..
كان مفروض أنْتظرك تجيني ..
لين أحسّ أنّك تبيني ..
لين أحسّ إنّي بقلبك شي ثاني ..
تترك الدنيا عشاني ..
تنتظرني ..
تحتريني ..
وإن غلبك الشوق ما جيتك تجيني ..
.
أندفعت أكثر من اللازم عليك ..
كنت من روحي أبيك ..
كثّر الله خير قلبك ..
قلت لك مرّة إذا تذكر تراني :
ما أعرف أخسرك كلّك ..
بس ما علمّتك أنّي ..
بينكسر بك شيّ مني ..
كثّر الله خير قلبك ..
صرت أعرف الحين لا حبّيت كيف أسوّي ..
صرت أعرف شلون أحب بدون قلب ..
صرت أعرف شلون أحبّ وما أحب ..
صرت أعرف الحين كلّ اللي أبيه ..
برجع لنفسي وأحاسبها عليك ..
ليه كانت معك تضعف ؟
ليه ؟ ليه ؟
وكلّ ليه أحتاج أرشّ بملحها جرحي ويعرف ..
ويتعلّم ..
كيف ما يتركك تقرب ..
كان عندك كاس فرقى هاته ..
وأسقني وأسقيك منّه ..
لين أغنّي :
( أسقني وأشرب على أطلاله
وأروٍ عنّي طالما الدمع روى
كان صرحاً من خيالٍ فـ هوى )
وآتهاوى ..
وأرجع لصمتي الطويل ..
أرجع لحزني القديم ..
أرجع آغنّي لروحي ..
مو طرب لكن أغنّي ..
( مو حزن لكن حزين )
مو حبيب أحّد ولكنّي أحبّ ..
مو بعيد كثير لكنّي بعيد ..
يالله خيره ..
وأنت أشوف عيونك الحلوة بخير ..
طار من غصن المحبين الحمام ..
والسلام ..
والسلام ..

[نواف التركي]

أنا محتاج لي ليلٍ طويل وضحكةٍ عذرى ..!!
وروحٍ كلّ ما رفّ الحنين بداخلي تقرى ..!!
بقى بالله أحد يقرى الحديث بـ روح ؟
ولا واحد من الأحباب ..
قدر يتوغّل بروح الكلام المزدحم بالصمت ..
لذلك كان لا بدّ الكلام يموت ..
وأنا شاعر ..
متى مات الكلام بدفتره بيموت ..
ولا أبغى أمرّ , مرور العابرين الممتلين بسخف ..
ولا أبغى أكون للنسيان ..
أنا أخترت الطريق الصعب ..
وأنا عارف من أوّل ما تخيّرت الطريق إنّ التعب أكثر ..
وقدرت أمشي ,
وأعدّي عمر من عمري ..
كأني أهرب من الوقت ..
.
.

تجين إن ضقت أغنّي لك ..
أنا صوتي يجي مثل المطر لا ضقت ..
وأغني لك ..
دخيل عيونك أن هبّ الحنين شلون ؟
أقول أشتقت ؟
أقول أنّي فقدتك عمر ؟
أقولّ أنّ المفارق جمر ؟
أغنّي لك ؟
ياليت أقدر ..
أنا يا جنّة الدنيا تعدّاني كثير الوقت ..
كثير أشتقت ..
ولا جيتك ..
ولا أقدر أجي مثلي مثل غيري ..
ولا أقدر أجي مثلي ..
أنا للأمس ولبكرة ..
ولا عمري قدرت أحضر عشان اليوم ..
وأحبّك بيني وبيني ..
وأحبّك أكثر من اللي ببالك مرّ ..
وبكرة بعد ما يقطف خريفي أجمل أوراقي ..
بعد ما أكفّن الدفتر ..
بتدرين أنّك أجمل ما كتبته للزمان الجاي ..
وتبقين بثغر طفلة تردد صوتي اللي مات ..
كثير الحكي لكنّ الكلام يغصّ بعيون الدموع ويلتجي للصمت ..
لذلك كان لا بدّ الكلام يموت ..
وأنا شاعر ..
متى مات الكلام بدفتره بيموت ..

[نواف التركي]

أفتح قفص قلبك , تغادرك الأسراب = وأحفر للأيام القديمة مقابر
خلّ أمس يسري لا تعلّق بـ / من غاب = جرحك قديمٍ ما يطببّه عابر
واللي ورى الأهداب خلّه بالأهداب = لك عمر صابر كمّل العمر صابر
ما تاقف الدنيا على فقد الأحباب = تلقى لكسرك بالمقابيل جابر
إن طاب ولاّ كذّب وقول لي طاب = أستر على جرحك دخيلك وكابر
أمّا تكون الحلم بعيون الأغراب = ولاّ تغيب وتفتقدك المنابر
خابرك قاوي لا ضحك للجفى ناب = وأبيك تبقى مثل ما كنت خابر

[نواف التركي]

http://www.aljazeera.net/mritems/images/2006/9/23/1_645236_1_34.jpg




ثبت يوم الصحيح وغبت ما بارت = بضاعتك يوم صار الموت ما عنّه

لا نامت عيون من يجبن إليا دارت = رحى الرصاص وتبدّت ريحة الجنّة

أخترت ذروة سنام المجد وأختارت = نفسك تموت بكرامتها على السنّة


مع طزّ كبيرة لكل مثقفي البلاك بيري والأيفون

[نواف التركي]

ما يوجع الفقد لكن توجع الذكريات = غيابك يهون لكن صحبتك ما تهون

كنت أجمل وكان للدنيا طعم والحياة = بتكون لا كنت وإلاّ في غيابك تكون

تبقى حديث الشجن والليل والأغنيات = وأبقى على خبرك اللي نصّ عقله جنون

[نواف التركي]

كلّ يوم يمرّ نكبر ..
كلّ يوم أحلامنا , تصغر و تصغر ..
خايف أصحى يوم وألقى العمر فات ..
خايف إنّ الذكريات ..
وحدها العمر الجميل ..
وإن هذا الباقي , ما بقى به باقي ..
كلّ ما أتفقدّ مكان ألقاه خالي ..
وأتذكّر ..
كانت الأيام أجمل ,
كانت الأحلام أكمل ,
لو بيدّي ..
كان أوقّف عقرب الدنيا وأظلّ هناك باقي ..
واللي باقي ما أبيه ..
لو بيدّي ..
لكن أدري ما بيدّي شيّ ..
وأدري إنّ الوقت يمشي ..
وإنّي أفقد كل يوم أرواح أكثر ..
وأنّي أكبر ..
وأنّ كل أحلامي بتصغر وتصغر ..
وأنّي بصحى وألقى كلّ العمر فات ..
وألقى بسّ الذكريات ..
حاضره والكلّ فات ..
كان باقي فيك حلمٍ ما وصلته لا يردّك شي عنّه ..
لا يفوتك ..
ذوق به طعم الحياة ..
بكرة أجمل ما بيبقى الذكريات ..
بكرة أجمل ما بيبقى الذكريات ..

[نواف التركي]

وهذا الشارع الخالي يذكرّني ..
وهذا الكرسي المهجور ..
وهذا الليل ..
وحبّات الرمل تذكر ..
وإذا مرّيت في نفس الطريق اللي خذاك ولا بعد جابك ..
تذكّرني مثل ما أتذكرك أجمل ..
أنا قد قلت لك مرّة إذا تذكر ..
محد يعرف قدر من حبّ لين يغيب ..
وكنت بنظرتك ساهي ..
بعيد هناك ,
وأنا وحدي مع روحي ,
ورجعت أمشي مع جروحي ,
رجعت أستدعي أجمل ما بقى بالذاكرة منّك ..
وكان الشارع الخالي صخب أرواح ,
منو باقي ومن هو راح ,
هي الدنيا كذا تدفع ثمن ضحكة عيونك دمع ,
نسيت الجاي قلت أفرح ,
وجاني الجاي ,
وكل ضحكة معك بدفع ثمنها جرح ,
مافيه أفراح بالمجّان ,
وهذا الجاي , وهذا الناي ,
وهذ الشارع الجمهور
وهذا الشاعر المهجور ,
وهذا البعد ,
محد يعرف ثمن من حبّ لين يغيب ,
فمان الله والدنيا وسيعة والطريق يطول ,
تبي تصدف كثير أحباب ,
وتضحك قدّ ما تقدر ,
وتتذكّر ,
محد تهتزّ له روحك مثل من غاب ,
محد يعرف قدر من حبّ لين يغيب ,
تذكّرني ..
تذكّرني ..
فمان الله .

[نواف التركي]

اللي يبيك يدلّك
واللي يبي فرقاك
دلّه على فرقاك ..

هذا الطريق اللي يودّي للعدم ..
هذا الندم ..
هذا أوّل الدرب الطويل ..
هذا هو الفقد الجميل ..
والباب
والغيّاب
والأحباب
واللي راح واللي جاي ..
أمشي وأنا ويّاي ..
وأقول له :
ضيّعت من عمرك عمر ..
ويقول لي من قال لك تنحت ضلوعك ناي ..

وأمشي وأنا وياي ..
وأرمي الحجر لبعيد , وأعدّ خطواتي معي , وألقاني أتعدّى البعيد ..
مدري الزمن يركض ..
ولاّ أنا أركض ..
وحده من الثنتين ..
يـ الله ياهذا الطريق اللي بديت من أوّله ..
وللحيني أمشي بأوله ..
ماكنّ له آخر ..
وأمشي وأنا وياي ..
مرّه أحس بضيقته , مرّه يحسّ بضيقتي ..
وأزرع له ضلوعي قصب , وأهيّضه بغناي ..
ليت السنين الطين ..
وأشكّل سنيني على مشهاي ..
وارجع معي لأوّل ..
الله يا أوّل ..
كانت ليالي غير ..
تذكر معاي شلون ..
أرواحنا بيضا ..
طعم القرى مغسول بكفوف المزن ..
وأنا تركت هناك ..
كلّ الأماني معلّقه بالمقبل من الوقت ..
وهذا أنا وياي ..
نمشي الطريق اللي يرجعنّا هناك ..
وهذا أوّله ..
وهذا آخري ..
خايف من اللي جاي , عايف من اللي راح ..
لو آخري بسّ يتجمل بي قليل ..
وأذوق طعم أوّل قليل ..
خايف وأنا وياي ..
هذا الطريق اللي يودّي للعدم ..
هذا الندم ..
هذا انا وياي ..